مشتــــــــــاق ...؟!
عمرك حسيت إنك مشتاق لحد أوي لدرجة إنه شاغل قلبك وتفكيرك وكيانك كله؟؟؟
عمرك حبيت حد لدرجة إنك بتتمنى له الرضا يرضى تبقى مش عارف تسعده إزاي وتعمله إيه؟؟؟
طيب يا ترى... مين هو؟؟؟
مين اللي يستاهل انك تحس بكل ده لمجرد ذكر اسمه وكمان مالي كل حياتك؟؟؟
مين اللي عطاءه وكرمه ونعمه عليك لا حد لها .. لاء وإيه كمان عمره ما هيطلب منك مقابل أبدا .. عرفت أنا أقصد مين؟؟ أيه طبعا هو ومين غيره ينفع يكون مكانه!!!
ربـــــــك وحبيبــــــــك ومولاك (((الرحمــــــــــــــــــــن))) جل وعلا
أكيد بتقول في نفسك إيه ده إنت جاي تكلمني عن حب ربنا .. طيب مين في الدنيا دي كلها مش بيحب ربنا !!!
أنا معاك بس قولي إيه دليل حبك ؟؟؟آه كلنا بنحب ربنا الحب الفطري اللي اتزرع جوانا مع ولادتنا ..
بس أنا هسألك وانت رد على نفسك وساعتها هتعرف إذا كنت بتحب ربنا بجد ولا بتضحك على نفسك؟
قولي .. مش اللي بيحب حد بيحب يكلمه يسمعه.. يقرأه.. ويشوفه كمان.. صح ولا إيه؟؟؟
أكيد بتقول آه طبعا.. طيب تمام.. كيــــــــــف حالـــــــــــك مع القــــــــــــــرآن؟؟؟
مش هو برده كلام حبيبك.. على كده بقى انت بتقرأه كل يوم .. لالالا..أكيد أكتر من مرة في اليوم..
أوعى يكون الرد لا.. أمال ازاي بتحبه؟؟طب ده أنا أسمع عن ناس من كتر حبهم في بعض بيقرأوا رسايل اللي بيحبوهم كل شوية ..
طيب ما هو القرآن رسايل حبيبك ليك وكمان بتاخد على كل حرف حسنة شوفت بقى عظم الأجر..
طيب خلينا في القيام!!
لو انت عارف إن في حد هيجلكم زيارة الساعة 2 الفجر ومعاه هيبقى حل لكل مشكلاتك,هيحقق كل اللي بتتمناه ويكن سعادتك مفتحها في إيديه هتعمل إيه علشان تستقبله مع إنه ميعاد نومك؟؟
اقلك أنا هتعمل إيه؟؟.. مش بعيد تعلن حالة طواريء في البيت كله علشان البيت يجهز لاستقباله وهتجيب أفخم المقبلات عشانه ماه يعني مش مهم كام مائة جنيه يتصرفوا في سبيل إن كل اللي بتتمناه يتحقق .. مش صح برده؟؟
طيب ماهو لله المثل الأعلى حبيبك كل يوم يتنزل نزول يليق بجلاله للسماء الدنيا من الثلث الأخير من الليل ويقول كما أخبرنا سيدنا محمد صلى الله عليه وسلم : هل من داعي أستجيب له "أطلب كل اللي بتتمناه".. هل من مستغفر لأغفر له.. فلا يجد منك إلا النوم والسُبات العميـــــــــق
على الرغم انه مش هيغرمك جنيه واحد!!بالعكس هيديلك كل اللي بتتمناه بدعوة صادقة تسبقها كلمة يـــــــــــــارب
طيب معلش ممكن سؤال ليكي يا أختنا بس استحمليني
هو اللي بيحب حد مش بيسمع كلامه؟؟؟ أكيد آه..طيب مش ربنا عز وجل فرض عليكي الحجاب الشرعي .. يـــــــــــــوووه تاني الحجاب؟طيب هقولك حاجة لو احد بيحب واحده أوي..وقالها أنا بغير عليكي جدااا..ومش عايز حد يشوفك غيري انتي بالنسبة ليا جوهرة.. هتعمل إيه لو قالها إلبسي الحجاب الشرعي؟؟
أكيد هتنفذ كلامه وهتبقى فرحانة لحبه ليها وتقول : أصلـــــــــه بيغيــــــــــر عليـــــــــا
طيب ماهو لله المثل الأعلى ربنا بيحبك وبيغير عليكي..فأيهما أحق بالطاعة؟؟؟
سبحان الملك تخيلي معايا ما أجمله من إحساس الذي تشعرين به حين تمشي في الشارع لا يعرفك لأحد ولا يراك أحد كأنك ملـــكــــة..أصل ربك حبيبك حماكي من شر عيون الذئاب!!
بقى بعد كل ده انتوا بتحبوه ولا هتيجوا يوم القيامة ويقولكم : أنتم كاذبون في حبكم لي فلو صدقتم لأطعتموني فيما فرضت عليكم ,,, فإن المُحــــــــب لمـــــن أحـــــب مُطيــــــــــع.
اللهم إنا نسألك حبك وحب من يحبك وحب كل عمل يقربنا إلى حبك .
الرئيسية 